Сергей Николаевич Русскихлэн «Гармониез»

Личности

Мон Сергей Николаевич Русских – Ижкарысь Крезьгуръя элькун колледжын баянъёслэсь но аккордеонъёслэсь «Гармония» оркестрез кылдытӥсь, дирижёр, Удмуртиысь лулчеберет удысысь дано ужась. Студентъёсмылэн коллективзы – калыккуспо вожвылъяськонъёслэн лауреатсы. Таяз арын оркестрмылы 30 ар тырмонэз пусйим. Россиын со выллем коллективъёс трос ик ӧз ни кыле, соин ик со уката дуно. Ог 40 ар талэсь азьло мон Удмуртие вуи, солы синмаськи но татчы улыны но ужаны кыли.

Сьӧд сюё музъем вылысь Ошмесо шаере

Мон вордски но будӥ Черноземьеын, Воронежын. Отысь творчество удысъя трос тодмо адямиос потӥзы - крезьгурасьёс, гожъясьёс. Крезьгур борды кыстӥськыны пичиысен кутски – нырысетӥ классын баянэн шудыны ӧдъяй. Зэмзэ верано ке, 1960-тӥ аръёсысь пияшъёслэн со яратоно интсрументсы вал. Школа бере крезьгурлы дышетсконме азьланьтӥ: нырысь училищеын, собере Воронежысь искусствоосъя кун институтэ пыри. Отын ик вуоно кышноме пумитай. Соин ӵош мон кыдёкысь Удмуртие – яратонэлэн вордскем шаераз - кошки. 1982-тӥ арысен Ижарын тыршисько – со ӝыны улонэ!

«Удмуртия – бордаз кыскись шаер»

Паймонэз ӧвӧл, Ошмесо шаер сюлмам сокем пыриз шуыса. Выжыосыным бурми. Татысь кыдёкын ик ӧвӧл Пётр Ильич Чайковский вордскиз, соин ик Удмуртия – бордаз кыскись шаер. Со аспӧртэмлыкез котькудӥз татын улӥсь адями мед шӧдоз вылэм. Дэбес, Яр, Алнаш но мукет ёросъёс – отын сыӵе таланто пиналъёс! Музъем творческой адямиосты сётэ.

Аслэсьтым пиналъёсме но крезьгурлы дышетӥ. Сергей пие – пианист, калыккуспо конкурсъёслэн лауреатсы.

Шер пумиськись «Гармония»

Баян – асэрико, трос куараё инструмент, нош куке соос трос… Оркестр усто крезьгурасьёсты будэтэ. Оркестр – со улэп маке но семья. Пиналъёс валаны кутско, мар со коллективен крезьгурез шудон. Мае уг быгаты одӥг адями, сое бадӟым коллектив быгатэ.

Ваньмыз кутскиз баянистъёслэн пичи ансамбльзы бордысь. Озьы коллектив ньыль ар ужаз. 1989-тӥ арын оркестрозь паськытам. Пыриськисьёслэн лыдзы пӧртэм вал, 30 адямиозь но вуылӥз. Симфони оркестрысь вань инструментъёс милемын ужазы. Со вакытэ кунын сыӵе коллективъёс ӧжыт ӧй вал. Нош али чик кепыратэк оркестрез шер пумиськись (уникальной) ниманы быгатӥсько – Приволжьеын кӧня ке крезьгуро колледжъёс но училищеос вань, но таӵе коллективъёс ӧвӧл. Урал сьӧры но учкимы ке, отысь но соосты ум шедьтэ.

Ним кема бырйыны ӧм быгатэ. Кытчы гинэ ум лыктӥське, ваньзы юало: «Тӥ гармошкаен шудӥськоды ук?». Ӧвӧл, со гармошка ӧвӧл, со гармоникалэн пӧртэмлыкез. Татын огназы шудӥсь баянъёс но аккордеонъёс гинэ ӧвӧл – нырысетӥ но кыктӥ скрипкаос сямен, озьы ик баян-альт, тенор но бас. Концертъёсын оркестрмес «Гармошка» но, «Грмонь» но шуылӥзы. Но ӧвӧл, «Гармония» нимаськон понна, гармониын шуыны дышетсконо. Нош гармония – со огкадь чебер чузъяськон. Со куинь ар ортчыса гинэ кылдӥз, соку ик нимамы.

Шудӥськомы баянлы аспӧртэм крезьгур гожъясь крезьгурчиослэсь произведениоссэс – Виктор Гридинлэсь, Александр Тимошенколэсь, Вячеслав Черниковлэсь. Удмуртиысь авторъёслэсь но классикаез милям инструментъёсмылы тупатыса.

Ортчем аръёс ӵоже оркестрмы быдэс элькунмес котыртӥз ни, пӧртэм огъяросси но калыккуспо вожвылъяськонъёсы пыриськылӥз. Владивосток, Казаннь, Санкт-Петербург, Екатеринбург, Киров – вань со каръёс коллективлэн «вормонъёсын картаяз» вань.

«Уг яратӥськы, куке ушъяло. Умой – со шонер, норма»

Россиын но дуннеын тодмо луись крезьгурасьёс вуылӥзы, оркестрен тодматскизы: Вячеслав Семёнов, Александр Скляров, Юрий Шишкин, «Липецкое трио» но мукетъёсыз.

Азьланезлы малпанъёсын – нимо-дано баянистъёслэн но крезьгурчиослэн творчествозылы сӥзем концертъёсы пыриськон. 30 ар тырмонмес пусйим, пусъем 35-ез но. Нош 40 ар тырмон пумысен чаклан-веранъёс вань, соин ик ум пусъе. Улытозям оркестрез возьыны тыршо.

Кызьы крезьгурасез будэтыны

Милемыз усто дышетӥсьёсмы умой дышетӥзы. Ми крезьгурен улыны тыршиськомы но сьӧрамы мынӥсьёсты со «висёнэн» черласькомы. Крезьгур – со лул кужымлэн люкетэз гинэ ӧвӧл, со кыл. Сое ваньзы валало, котькыӵе кунын мед улозы. Мон шуысал, крезьгуро эсперанто. Кызьы вералляз Елена Камбурова: «Мон 15-тӥ даурысен туала вакытозь путешествовать карыны быгатӥсько. Мон – шудо адями». Со ласянь учконо ке, мон но шудо луонлы матэктӥ.

«Крезьгур – со аспӧртэм эсеранто, вань кылъёсын валамон»

Тон баянист, скрипач но пианист луыны кулэ ӧвӧл, луыны кулэ крезьгурась. Инструментъёсты люкыны уг яра. Собере искусстволэсь ӧръёссэ огазеясь художник мынэ. Нош мар понна? Со чурлэн йылаз – адями. Со понна ми таин выриськомы. Соин ик нылпи лыктэ но та ужез валаны дышетске. Чиньыосын лобаса кадь ӝог шудыны тырмыт ӧвӧл. Гармония луыны кулэ – луллэн но мугорлэн.

Оркестрын шудӥсьёс крезьгурез кылыны, шонер гур сётыны, ӵошен ужаны дышетско. Тросэз выпускникъёсмы ӧнерзыя усто ужъемышъёс возьмато, нош куд-огез, оркестрын мылкыд басьтыса, дирижёрлы дышетско.

«Уг яратӥськы, куке ушъяло. Умой – со шонер, норма» – Сергей Русских

Ӟуч кылысь берыктэм.

Добавьте свою историю о событии или человеке!

Добавить свою историю