Зинаида Кудрявцева: «Ижысь трамвайёс – мынам адӟонэ!»

Личности

ХХ даурысь 20-тӥ аръёс

Мон Ижкарын 1925-тӥ арын вордски. Улӥмы асьме коркаямы Свободы ульчаын. Анай-атаелэн бадӟым хозяйствозы вал – парсьпиос, скал, курегъёс, вал. Город соку гинэ азинскиз. Центр вал отын, кытын али Советской ульча, отын тужгес чебер кораос сылӥзы.

Эшшо одӥгез ульча, кудӥз Ижын азинскемын вал, - Максим Горький нимо. Азьвыл со Базарной нимаськиз.

Тодам вайисько, кызьы тямыс арес дыръям анаеным черке ветлӥмы – Михайловской соборе. Берло сое куашкатӥзы. 

Базарной ульча ХХ даур кутсконын. iz-article.ru

Нырысетӥ электротранспорт

1935-тӥ арын, куке мыным 10 арес вал, Ижын трамвай сюресъёсты лэсьтон мынӥз. Ми сузэреным Карл Маркс нимо ульчае ветлӥмы но лэсьтӥськисьёслы ву нуллӥмы.

Ижкарын трамвай сюресъёсты лэсьтон. Удмуртиысь шор кун архив

Соку радио но электротыл ваньмызлэн ӧй вал на. Ваньмыз пулъёслэсь тротуаръёс вылтӥ пыдын ветлӥзы.

Ижын улӥсьёс, синмаськем муртъёс, Карл Маркс но Советской ульчаос вожысь час улын пумиськылӥзы. Нош куке ож кутскиз, карын улӥсьёс 6 час ӵукналы татчы кыстӥськылӥзы фронтысь иворъёсты кылзыны. Собере заводъёсы мынылӥзы.

1941-тӥ арысь 21-тӥ инвожо пыраклы тодам кылиз – ож азьын берпуметӥез шыпыт, умой нунал. Мон 16 аресам мынӥсько вал. Сузэреным ӵош Пастухов нимо садэ эктыны мынӥ. Нош ӵуказеяз сое военкоматэ ӧтизы но фронтэ келязы - Зинаида Кудрявцева

Быдӟым Атыкай ож аръёсы

Карын улон ӝог воштӥськиз. Мон 6-тӥ ремесленной училищее пыри, дышетскон ар 2-тӥ куарусёнэ кутскиз. Нуназе дышетскимы, нош уйин Сенной рынок вӧзысь бадӟым бараке мынылӥмы, отчы заводэз эвакуировать каризы.

З. С. Кудрявцевалэн (Морозовалэн) трудовой книжкаез но нырысетӥ Данъян грамотаез. «ИжГЭТ»

Толалтэ милемыз нырысетӥ трамвай деполэн юртаз выжтӥзы, отчы заводлэн 74-тӥ цехез интыяськиз. Фрезерной станокъёсын ми танкъёслы ёзъёс лэсьтылӥмы.

Ялан кӧлэм потэ вал. Кӧня ке шутэтскон понна йыр улэ пӧзьёсты понӥськомы но кезьыт бетон вылэ выдӥськомы вал, 15-20 минут кӧлыса, ужмес азьланьтылӥмы.

1941-тӥ ар пумын нырысетӥ грамотаме басьтӥ - «За успешное освоение профессии «Фрезеровщик»».

Куке милемыз выльысь бараке выжтӥзы, ТТ пистолет поттыны кутскимы. Отын мон тямыс станокъёсын ужай, вань операциосын.

1942-тӥ арын фронтын тужгес секыт вал, Иже трос пиналъёсты эвакуацие вайизы. Монэ, 17 аресъем нылмуртэ, мастере юнматӥзы но Киевысь, Воронежысь, Тулаысь ваем 26 нылъёсты дышетыны сётӥзы. Общежитиын ӵош улӥмы, ӝытъёсы радио пыр фронтысь иворъёсты кылзылӥмы.

Эшшо одӥг городэз мозмытыкузы шумпотылӥмы, уг ке быгато вал, бӧрдылӥмы. Сюлме али но кылемын, куке ми «Три танкиста» кырӟанэз кырӟаса строен ветлӥмы…

Собере мыным 14 аресъем быдэ вуымтэослэсь группазэс сётӥзы, тросэз - гуртъёсысь. Чидантэм секыт вал, соин ик куд-огез анайёссы доры пегӟылӥзы. Соосты шедьтыны кулэ вал. Судъязы, тюрьмаозь но. Мон нерваослы сыӵе секытэз ӧй чида но мукет уже выжтыны кури. 

Ижкарысь Трамвай управлениын ужасьёс. 1940-тӥ аръёс (З. С. Кудрявцева нырысетӥ радын паллян палаз). «ИжГЭТ»

Директор трамвай управление мыныны ӵектӥз. Но отын токарьёс но фрезеровщикъёс луыса военнопленнойёс ужазы, буш интыос ӧй вал. Куке управленилэн кивалтӥсез Василий Баранов тодӥз, мон уже интыяськыны лыктӥ шуыса, секретарьлэсь интызэ ӵектӥз.

Ож аръёсы туж секыт вал ужаны, светомаскировка вал, электротылэз туж ӵем кысылӥзы. Но тужгес бадӟым кылкутон вал сӧсырмемъёсты нуллон ужын. Казанской вокзалысь солдатъёсты школаосъя нуллӥзы. Нырысь 25-тӥ школае нуо вал, собере – 22-тӥ, 27-тӥ но 16-тӥ. Кытын али «Океан» магазин, отын одӥг этажъем 16-тӥ школа вал, шутэтскон парк вӧзын – госпиталь. Ваньмыз со уйин лэсьтӥськиз.

1944-тӥ арын управлениын экономист висьыны усиз. Нош отчётъёс лэсьтоно вал. Озьы ми Василий Андреевичен экономикаез тодыны-валаны, инструкциосъя отчётъёс но предприятилэсь 1945-тӥ арлы ужан планзэ лэсьтыны кутскимы. 

«ИжГЭТ» предприятие мынам адӟонэ луиз - Зинаида Кудрявцева

Со арын ик инвожое мон нырысетӥ командировкаям мынӥ – предприятилэсь тунсыкъёссэ утьыны.

Тупаса улон дыръя

Ож бере карез умоятыны кутскизы, трамвайёсты выльысь лэзизы но одӥг сюресъем люкетъёсты быдтылӥзы. Отчы управлениысь вань ужасьёс пыриськизы.

Туж секыт ке но вал, огкылысь ужамы, соин ик азинлыко.

Тӥни озьы, одӥг управлениын нырысь экономист, собере валтӥсь экономист, собере плановой ёзэтлэн кивалтӥсез луыса мон 40 ар ужай но пенсие кошки.

Но предприятиен кусыпме ӧй ышты – парторганизацилэсь пуктэмъёссэ быдэсъямез чаклай. 1989-тӥ арын монэ Ветеранъёслэн кенешенызы кивалтӥсе бырйизы, нош собере озьы пӧрмиз, монэ выльысь ужаны ӧтизы, мон эшшо сизьым ар экономист луыса ужай на. 

Туннэ ми «ИжГЭТ» предприятиысь ветеранъёсын электротранспортлэн музеяз экскурсиос ӵем гинэ ортчытъяськом, дышетскисьёслы трамвай ветлонлэн историез сярысь вераськом.

«ИжГЭТ» предприятие мынам адӟонэ луиз, татын кузпалэ но, нылъёсы но, эмеспие но ужазы. Мон вань сюлмысьтым коллективл сӥзисько: уте предприятиез, данъяське но тодэ, тӥлесьтыд уждэс дунъяло, адямиос тӥледлы асьсэлэсь улонзэс оско!

Кин ортчемзэ тодаз уз вайы, со азьланьзэ уз адӟы! Зинаида Кудрявцева

Ӟуч кылысь берыктэм.

Добавьте свою историю о событии или человеке!

Добавить свою историю