Ужез ас калыкезлы пайда вае. Валентина Наумовалэн историез

Личности

Мон – Глазовысь «Иднакар» газетысь корроспондент Альбина Бушмакина. Мынам Яр ёросысь Озёрка гуртысь Валентина Евгеньевна Наумова сярысь вераме потэ. Со ас улонзэ нылпиосты дышетонлы, шаертодонлы сӥзиз. Удмуртлыкез азинтонын мыло-кыдо ужамез понна «Удмурт кенешлэн» Данъян книгаяз пыртэмын. Удмурт лулчеберетъя «Ошмес син» центрлэн кивалтӥсез луэ. Валентина Евгеньевна Озёрки школаын удмурт кылъя но литературая дышетӥсь луыса ужаз. 2015-тӥ арын школаез ворсам бере, Ярысь нылпи творчествоя юртын тыршиз. Нуналмысь автобусэн, но ӵемгес попутной машинаосын, олань-талань ветлоно вал, соин ик ужысьтыз кошконо кариськиз, табере нунокъёсыныз пуке. 

Баянэн шудэме потэ вал

Валентина Евгеньевна Дусыково гуртын вордскемын, отын начальной школае ветлӥз, 8 классэз Ворцаын йылпумъяз. Собере Ярысь педучилищее дышетскыны пыриз. Студент вакытъёсыз туж яркыт ортчизы, вуоно улонэзлы умой инъет сётӥзы.

«Бырйи начальной классъёсы дышетӥсьёсты дасянъя отделениез, малы ке шуоно отын баянэн шудыны дышетылӥзы. Школаысь дышетӥсе физкультурая отделение ӵектэ вал, мон спортэз яратылӥ, соревнованиосы ветлылӥ. Маме косэ вал трудовое, вуриськыны, киужъёсын вырыны, сиён дасяны дышетозы шуыса. Ачиз библиотекаын ужалляз, гармошкаен шудылӥз. Со шоры учкыса ик, мынам юн баянэн шудэме потылӥз», - тодаз вае Валентина Наумова

Педучилищеын басьтэм быгатонлыкъёсыз яразы. Крезьгур тӥрлыкен шудэмзэ али но пӧртэм ужрадъёсын, концертъёсын, юонъёсын но кылыны луэ. Огдыре гуртазы кык нылкышноос шудылӥзы, клуб улсын дуэт кылдытӥзы. Вот соку зол шулдыртылӥзы калыкез: кырӟаллязы, эктылӥзы, такмакъёс быдэстылӥзы. 

Улон сюрес вуттӥз Озёркае

Ньылетӥ курсын дышетскыкуз, Валентина Юкаменск ёросысь Ёжгуртын практика ортчиз. Шӧдтэк шорысь солы Озёрка школае уж ӵектӥзы. Мумиз пумит вал ке но, дышетсконзэ кызьы быдтоз шуыса, нылыз мылкыд кариз ужаны.

«Папмы вазь улонысь кошкиз, ми куинь пинал кылимы. Коньдон ӧз окмылы, соин ик оскизы бере, школае мынӥ», - вера Валентина Евгеньевна

Начальной классъёсын одӥг ар гинэ нылпиосты визьноданы кылдӥз, кыкетӥ араз егит дышетӥсьлы удмурт кылэз но литератураез нуыны дэмлазы. Предметъёсъя тодон-валанъёссэ муромытон вылысь, заочно амалэн, Удмурт кун университетэ пыриз. Но со дыре бызиз, пиналыз вордскиз, дышетсконэн йырин ӧй ни вал. Дшетӥсьсылэн Александр Шкляевлэн документъёссэ но сётэмез уг поты вылэм, визьмо, трос тодӥсь-валась студенткалы одно ик дышетсконзэ азьланьтоно шуыса. Вылӥ образование Валентина басьтӥз Глазовысь пединститутын, филологияя факультетэз быдтӥз. Берло школаын ӟуч кылъя но литературая урокъёсты но нуылӥз. 

Удмуртлыклы сюлмыз бурмемын

Но сюлэмызъя вал удмурт кыл но литература. Пиналъёслы но анай кылэз гажан мылкыд пыӵатылӥз. Солэн валтэмез улсын нылпиос вылез борды кыстӥськылӥзы, гуртсылэн, ёроссылэн, шаермылэн историеныз тунсыкъяськылӥзы, гожъяськон удысэ нырысетӥ вамышъёс лэсьтылӥзы.

«Пинал дыръямы ӟуч сямен вераськыны ик ӧм быгатылэ. Нош школаын удмурт кылэз мон тямысэтӥ классозь гинэ дышетэмын. Литературая программае асьме кылбурчиосмылэн но писательёсмылэн творчествозы ичи пыртэмын вал, тросгес ӟуч писательёслэсь берыктэм произведениоссэс лыдӟылӥмы. Соос пӧлын ӧй вал Кузебай Герд, Кедра Митрей но мукетъёсыз. Али программа юн тунсыко ни, книгаос кыӵе чебересь потто, но соосты лыдӟисез ӧвӧл. Тросэз школаос «Ӟеч-а, бур-а, удмурт кыл» программае выжизы. Нош со удмурт кылэз дышетыны мылкыд карись ӟуч адямиослы чакламын. Тани Яр ёросын классической программая Бачумовоысь школа гинэ ужа на», - ӝожоме дышетӥсь

Анай кылтэк мӧзмыт

Озёркаысь школаез ворсам бере, пиналъёс Пудэеме дышетскыны кошкизы. Бӧрысь вераллязы ни, удмурт кыллэсь туж мӧзмо шуыса. Пудемын калык ӟучомемын. Нош али Озёркаысь пиналъёс но сьӧразы кыстӥсько ни, куспазы ӟуч сямен вераськыны тыршо. Азьло сыӵезэ уд кылы вал. Куке-соку Озёркае лыктэм узбек семья воксё удмуртомиз, ваньзы вӧл-вӧл удмурт сямен вераськыны дышизы. Тросэз школаын дышетскись пиналъёс укмысэтӥ класс бере, экзамен сётыны удмурт кылэз бырйылӥзы, уго шӧдылӥзы, дышетӥсьсы рос-прос тодон-валанъёс сётэ шуыса. 

«Витетӥ-укмысэтӥ классъёсын дышетскись нылпиос фольклор кружоке ветлылӥзы. Юн умой радъямын вал шаертодонъя ужмы. Узыр материал люкамы музеямы. Топонимикая азбука поттӥмы, Быдӟым оже ветлэмъёс сярысь трос тодӥмы, турмаршрут усьтӥмы. Вуылӥзы ёросысь но палэнысь адямиос, одно ик музеенымы тодматылӥмы, чебер инкуазьмес возьматылӥмы. Учкакаре но, археологъёслэн копаськон интыосазы, нуллылӥм. Но сюрес ми доры юн кузь, дуно, туристъёс ичи луизы. Музеймес но школаысь клубе поттӥмы, пичи гинэ инты висъямын», - мачке Валентина Евгеньевна

Пиналъёс мыло-кыдо ветлылӥзы фольклоръя «Чингыли» коллективе. Удмурт шудонъёсты, кырӟанъёсты, эктонъёсты дышетылӥзы, сям-йылолъёсты возьматылӥзы. «Куно пумитан», «Армие келян», «Сюан», «Пудо поттон» йылолъёс кытысь ке басьтымтэ, татын улӥсьёслэн мачкемъёссыя пуктэмын вал. Зол вал песянайёслэн «Зарни сюлэмъёс» коллективзы. 2007-тӥ арын удмурт лулчеберетъя «Ошмес син» центр усьтӥськиз. Пиналъёсын «Быдэ вуон» йылолэз дасязы. Валентина Евгеньевналэн верамезъя, со песянайёс азьын экзамен сётон кадь луиз.

Улон пӧзе вал

Гуртын одӥг концерт но пиналъёстэк ӧз ортчылы, сцена вылэ соос поталлязы удмурт кылын гинэ. Шуркынмонэ школаязы удмурт кыллы но литературалы сӥзем нуналъёс ортчылӥзы, нош тулыспалэ Анай кыллэсь нуналзэ пусйылӥзы. Олокыӵе но ужрадъёс чаклаллязы, нылпиослы тунсыко но пайдаё мед луоз шуыса. Школа, библиотека, клуб одӥг герӟетын тыршылӥзы.

«Тэк пукыны воксё дырмы ӧй вал, урокъёс бере дыбыр клубе репетициосы мынылӥмы ни. Нош школаез пытсам бере, улонмы чус луиз. Тани егитъёслэн «Шунды» огазеяськонзылэн ёросысь ёзэтэныз кусыпъёс возиськомы. Юрттӥськомы ужрадъёс ортчытъяны. Но мылкыд куашка, пиналъёс ӟучомемын шуыса. Удмурт сямен акцентэн верасько. Ӟеч-ӟеч удмурт кылэз тодӥсь нылпиосын ик ужам потэ. Соослы мар ке сярысь мачкиськод ке, паймо, шумпото, курекъясько. Нош ӟуч пиналъёсты удмурт кылын уд паймыты ни», - жаляса вера Валентина Наумова

Валентина Евгеньевна «Иднакар» музеен но кусыпъёс юнматыны быгатӥз. Археологъёслэсь Учкакарын гудӥськемзэс тодыса, дышетӥсь, маке со сиён-юон басьтыса, соосын тодматскыны мынӥз. Бӧрысь эшъяськизы, пӧртэм ужрадъёс ортчытъязы. Пиналъёс музеен радъям «Гид из прошлого» проектэ но пыриськимы, Екатерина Поздеева отын вормисе потӥз, али нылаш Пудэм школаын дышетске.

Валентина Наумова «Сельская правда» ёрос газетэн но кусыпъёс возе. Отын Озёрка гурт, солэн историез, улӥсьёсыз сярысь статьяосыз печатласько. Кышномурт паймытэ лулкужыменыз, пуксисьтэм мылкыдыныз. Гуртоосыз сое гажало шырыт сюлэмыз, чырмыт мылкыдыз, ас калыкезлы пайда вайыса ужамез понна.  

Другие истории автора

Добавьте свою историю о событии или человеке!

Добавить свою историю