Михайловна. Юлия Поздеева сярысь история

Личности

Мон – Глазовысь «Иднакар» газетысь корроспондент Альбина Бушмакина. Тодмато ёросысьтымы Козлово гуртын вордскем Юлия Михайловна Поздеевалэн улон сюресэныз. Пумиськылыкумы со пинал дыръяз война вылтӥ секыт ужамез сярысь вераз.

Шулдыр тулыс куазь. Укноос вылын помидор росода будэ, сьӧд писяй диван вылын изе. Нош Юля песянай, очкизэ поныса, ӝӧк сьӧрын книга лыдӟе. Таяз Джек Лондонлэсь «Белый клык» повестьсэ кутэм. 88 аресъем кышномурт лыдӟиськыны яратэ, ялан выльзэ тодэмез потэ. Нош милемлы тунсыко, кызьы война аръёсы шуг-секытъёсты вормизы. Мачкисез арысь аре ичигес кыле ук.

«Баба бордын будӥмы»

Юлия Михайловна Поздеева вордскемын Глазов ёросысь Козлово гуртын. - Дедэ Гаврила Николаевич армиын 25 ар служить кариз. Кык гинэ пиналзы вал: Варвара но Михаил, - мачке кышномурт.

Михаил Гаврилович, Юлялэн айиз, 1939-тӥ арын финской войнае кошкем. 1940-тӥ арын сентябре гуртаз бертэм, нош 1941-тӥ арын воргоронэз Быдӟым Атыкай войнае басьтӥллям.

«Айи войнае кошкыку, дедмы уг ни султылы вал. Мон куинетӥ классэз быдтӥ. Сиён ӧй вал, соку ик ужаны кутски, гужембыт живот возьмай. Баба бордын будӥмы», - тодаз вае Юлия Михайловна 

Сюрес лэсьтонын

Семьяын ньыль нылпизы вылэм. Мумызэс чугун сюрес вылэ – 2-тӥ путез лэсьтонэ ыстӥллям. «Азьло татын одӥг путь гинэ вал», - шуэ Юлия Михайловна. Нош Ижевск-Балезино чугун сюресэз лэсьтыны кутскем бере, ньыль нылпилэсь анайзэс отчы келяллям. Мукет сюрес вылэ ыстӥллям пиналъёсты.

- Мон, Люба, Раис, Геня но Толя кык валэн мынӥмы Ниж-Кузьма но Карасево вискысь сюресэз тупатъяны, Сибир сюрес шуылӥзы. Выръёссэ киркаен копаса, гопъёсаз сюй тырылӥм. Быдтӥмы но, Юкаменской трактэ келязы. Опеть ик валэн мынӥм. Турнан дыр вуиз ни, турын дасяно. Начальникмы, кышномурт, обедэ люказ но шуиз: «Пиналъёс, кошке гуртады. Номырлэсь но эн кышкалэ, пиосъёс ӧвӧл бере, кин турын дасялоз». Олокытысь сьӧд валэн сьӧд дӥсьёсын кык воргоронъёс вуизы. Одӥгез шуэ, сюресэз, пе, лэсьтоно, немецъёс лыктӥзы ке, кызьы ветлозы. Сое кылыса, бигер кышноос вылазы черекъяськыны кутскизы ук. Пиосъёс ӝоггес уробоязы пуксизы но кошкизы. Ми гуртъёсамы мынӥмы, - тодаз вае кышномурт.

Шудтэм учыр

Собере Юлия Михайловна 2-тӥ путез лэсьтонэ шедем. Гуртъёсысь юн трос калык ужам. Но одӥг пол шудтэм учыр луэм.

- Эшелон балластэн (луоен) вуиз. Поезд дугдылытэк мынэ, ми на ходу луо пазяськомы. Начальникмы шуиз, сигнал, пе, сётозы но, бортъёс усьтӥськозы. Сыӵе ӝог со луиз, валаса но ӧй вуы. Соку мон усиськем, сознаниме ыштӥськем. Март толэзь вал. Шӧдӥсько, монэ вырето шуыса, а вазьылыны уг быгатӥськы. Дӧдьые понӥзы но гуртам нуизы. Соседкае шуиз, пельпумыд, пе, потэмын. Ачиз ик тупатӥз.

Чугун сюрес вылын ужасьёс одӥг стакан пызь басьто вылэм, нош висись нылашлы пай ӧз ни сётъялэ. Пиналъёс сиёнтэк кылизы.

Уж - быронтэм

Одӥг пол бригадирзы доразы лыктӥз но колхозэ ужаны ӧтиз. Со дырысен Юлия Михайловна гурт удысын тыршиз ни: скал но кыскылӥз, парсь но сюдылӥз, мар косылӥзы, сое ик лэсьтылӥз. Тодаз вае, кызьы Кыпкае ошпиосын йӧл ворттылӥз, малы ке шуоно валъёс ичи вал - войнае басьтӥзы.

- Тямыс часэ ӵукна йӧл нуисько, кык-куинь часэ лыктӥсько. Бригадир вите ни, эшшо уж сётэ на. Одӥг пол вераз, Дзякиноын, пе, дрезина сылэ, отчы валэн ю тысь нуллоно. Огням мынӥ, мырдэм мешокъёсме ӝутъяй – чугун сюрес ӝутэмын ук, тубонэз меӵ. Кури юрттӥсь. Мынӥз монэным 9 аресъем пи. Куазь зоре, сюрес урод, уробомы нӧдӥз. Пияшлы шуко, мон донго, нош тон валлы «ӧп, ӧп» кар, озь солы капчигес кадь. Кык кузя мешокъёсты дрезинае ворттӥм.

50 ар ортчыса

Юлия Михайловна война вылтӥ секыт улонзэ мачке, но война бере капчигес ӧз луы. Атайзы ожмаськонысь ӧз берты. Трос аръёс ӵоже со сярысь нокыӵе иворъёс но ӧй вал. Нош одӥг пол, 1992-тӥ арын гужем, кышномуртэз сельсоветэ ӧтизы. Отын ивортӥзы, папезлэсь лысьӧмъёссэ Ржев улосысь шедьтӥллям шуыса. Ӟепаз гожтэтэз вылэм, но лыдӟыны сое ӧз ни луы.

- Гожтэтсэ Белоруссие братэлы келяй. Со эмеспиеныз ветлэм Ржеве. Отын тодэм, тятьмы пленэ шедиз шуыса. Улӥсьёс мачкиллям, кызьы немецъёс пленнойёсты курадӟытылӥзы. Братэ шуиз, сыӵеосты кылзыса, пе, «даже хлопцы плакали». Немецъёс, пе, самолётысен сиён кушто но черекъясько: «Русские свиньи, жрите». Басьтыны кутско ке, киосазы сюлоен шукко. Киосынызы медам сие, ымынызы гинэ. Озь ик тусьысь картошкаез яке кулэм валэз сиыны косо вылэм.

Зурод сутскиз

Тятез сярысь ивор гужем вуиз, турын дасян вакытэ. Сельсоветысь бертэм бераз, внукъёсыныз мажтаськыны мынӥллям. Шуэ, нервничать но, пе, ӧй кары кадь, нош ужаны уг быгатӥськы - пограсько.

- Гуртэ лыктӥ, изи. Турынэз октыса-калтыса, пиналъёс но вуизы. Ӝытазе нош ик ӧти зуродмес эскерыны. Учкисько, ӵын потэ. Ӧм ни мынэ, сутӥсез но отын шуыса. Кышкамы.

Соку Поздеевъёслэсь сяна, эшшо 7 зурод сутӥллям на. Йыртэмасез ӧз шедьтэ, нош турын выльысь дасяно луиз. Ярам, колхоз луд висъяз.

Война бере

Козлово гурт кемалась ӧвӧл ни, интыяськылэм со Карасево котырын, Жаба шур дурын. Кышномуртлэн верамезъя, война кутскыку, Козловоын 20 корка вал, куиняз нылпиос гинэ кылизы. Ваньмыз колхозын ужазы.

- Ю тысь каре нуллылӥмы. Ваёбыжын (али Западной посёлок) ульча юн урод вал. Уробоелэн колёсаез тӥяськиз. Пыри одӥгаз корка, отын пересь воргорон. Учкиз но шуиз: «Девка, мон тыныд пукто колёса, нокинлы но сое эн сёты».

Пиосмурт нылашлы кузьмам вашкала колёса но сюло – тямысэн, пе, пунэмын вал.

«Козловоысь 25 воргорон войнае кошкиз, лыктӥз кык мурт гинэ. Одӥг семьяысь вить пи войнае быриз», - шуэ Юлия Михайловна 

- Война бере огдыре Козловоын умой улон вал. Илья Максимович Козлов кузё вал, но сое Глазове басьтӥзы. Собере председателе конюхез – Пётр Константинович Усольцевез - пуктӥзы, грамотаез ӧй вал ке но. Войнае со валъёсты нуиз вал. Калыклы умой лэсьтыны турскылӥз. Йӧл кыльылӥз ке, колхоз парсь пияз ке, собрание люкалляз, калыкен вераськылӥз, мар кароно, мултэссэ вань улӥсьёслы люкылӥзы. Нош Верх-Кузьмаен огазеямзы бере, улон урод луиз.

Музъемез мертась

Туннэ улон сыӵе, саклыктэ ыштӥд ке – пӧялозы. Азьло но пӧялляськисьёс вылэм. Одӥг пол гуртазы землемер лыктэм: гырытэк аналтэм, урод музъемъёсты, пе, мерталоз. Кошкем бераз, муш возисьлэн сюсьёсыз ышиллям. Кӧня ке нунал ортчыса, гуртооссы Волоке нин кесяны мынӥллям, ӵапак со землемерез адӟиллям. Ачиз, пе, изе, рамаосыз дораз. Лыктыса, председательлы вераллям. Бӧрысь тодмо луэм, калыкез пӧясьлэн, нимыз-тулыз но музон вылэм шуыса.

Поздеевъёс 

1950-тӥ арын нылашез ветеринаре дышетскыны Учхозэ ыстылӥзы, но дышетӥсьсы ӧз лыкты. Ар ӵоже отын улоно луиз, аппаратэн скал кыскыны дышетӥзы. Нош 1952-тӥ арын Верх-Кузьмае бызиз. Отын ик улӥзы Серафим кузпалэныз, берло Кожиле улыны выжизы. Мужикез военной заводын Глазовын тырше вал, война дыръя Воткинскын военной заводын ужам. Тросэз ӵош ужась эшъёсыз кулӥллям, соин воргорон заводысь кошкем, колхозын электрик луыса ужам. Куамын ар ӧвӧл ни. Поздеевъёс ныл но пи вордӥзы.

Али Юлия Михайловна пиеныз но кенэныз улэ. Вить внукъёссэ будэтыны юрттӥз, табере укмыс правнукъёсыз шумпотто ни. Аръёсыз шоры учкытэк, песянай тэк уг пукы: бакчаын ужаны яратэ, курегъёсты сюдэ-утялтэ. Ужамез уно грамотаосын, медальёсын пусъемын. 

Другие истории автора

Добавьте свою историю о событии или человеке!

Добавить свою историю