Эшъяськон тулкымъёс вылын. Алексей Ельцовлэн историез

Личности

Алексей Алексеевич Ельцов – удмурт журналист но кылбурчи, Россиысь писательёслэн но журналистъёслэн огазеяськонъёссылэн ёзчиез, Удмурт Элькунысь сиё-дано журналист, Росси Федерациысь дышетон удысысь сиё-дано ужась.

Валамон кылын вераськон

Мон вордски но будӥ Яр ёросысь вашкала удмурт гуртын. Тодосчиослэн гожъямъёссыя со кылдэм 16-тӥ даурлэн пумаз. Одӥгаз документын гожтэмын, Тум шур дурысь починкае Укана гуртысь одӥг семья выжиз шуыса. Бадӟым но мур нюкъёсысь бызись кезьыт ошмесъёсысь кужым люкась Тум шур дуре пуксем дорме удмуртъёс Дӧжигурт шуо. Ватка губерниысь калыклэсь улэм-вылэмзэ гожъяса ветлӥсьёс сое вераны но, гожтыны но валаллямтэ, шӧдске. 18-тӥ-19-тӥ дауръёсы гуртэлэн нимыз кагазъёс вылэ Доржино шуыса пусъемын. Соин ик архивъёсысь утчаськыны мылкыд карисьёс Тум яке Дӧжигурт гожтэмъёсты шедьтыны шугъяськозы. 19-тӥ даурлэн пумаз гуртамы ньыль сюлэсь ятыр адями улэм ни, 1920-тӥ аръёсы — вить сюлэсь уно....

Пичиысен мон шур дурын будӥ,

Солэсь данзэ валай туж вазь.

Куке песянае чылкыт вуэн удӥз,

Вераз: «Та ошмесэз тодад тон возь!»

Мукетызлы нош дышетӥз монэ муми:

«Эн вунэты тау шуыны ошмесмылы!»

Но со индылонъёс уло визьмын, лулын.

Кулӥз муми. Ӧвӧл ни песянай…..

Куректонлы ӧй сётӥськы, чидай.

Тау карисько мон со понна Тумлы —

Гуртлы, шурлы, отысь ӟеч калыклы.

Дыр ортчемъя тросэз ышиз, вунӥз.

Мон тонэныд котьку луо артэ,

Дуно шуре, эзе, вордскем гуртэ!

Алексей Ельцов. Тум. Сонет тугокоысь.*

Матрон песянае, кытчы ке мыныкуз, одно ик монэ сьӧраз нуэ вал. Пересьёсты буре ваён кисьтонъёсы вазь ӵукна ик потылӥм. Пудем шайвылозь тямыс иськемез пыдын ортчылӥм. Отысь но доре пыдын ик бертылӥм. Шай вылын кӧшкеманэз-мар уг валаськы вал кадь. Песянайлэсь верамъёссэ сак кылзылӥ. Кин кытын ватэмын, ваньзэ со рос-прос мадьылӥз. Аслэсьтыз мумы-бубызэ но, песянай-песятайзэ но вералляз. Зэм, туннэ со мадемъёсыз уйвӧтын кадь гинэ тодэ лыктыло на. Пудем каргуртэз ми палъёс «завод» шуо вал. Угось отысь ваньмыз сямен ужась калык та заводысь корт нуйтон, вандон, кисьтон котырын тыршиз. Лэсьтӥллям сое 1759-тӥ арын (Иж заводлэсь одӥг арлы вазьгес) Келарев но Ляпин вынъёс-купецъёс. Берло, пунэмъёссы трос люкаськемен, Омутнинскысь Осокин купец соин кузёяськем…

Автомашинаос со вакытэ туж ӧжыт вал ай. Тодӥсько на пичигес гинэ кузовензэ. Ас вылаз кӧня нуыны быгатэмезъя сое «полуторка» нималлязы. Ярлэсь кызё иськемлы кыдёке интыяськем гуртамы таӵеосыз но шер вуылӥзы. Адямиосты но юртъер котыре кулэ луись арбериосты нуллӥсь такси Глазовысь ветлылӥз на (дэраен возъям кузовен огшоры машина вал). Ярам ни, вашкала Сибирь сюрес кузя со вакытэ сыӵеез ке но ветлылӥз. Нош туннэ отӥ машинаен ортчыны ик уг ни луы — писпуос будэмын, номырлы ярантэм аналтэмын! Та сюрес кузя интыяськем но солэн палэназгес сылӥсь тросэз гуртъёс нокыӵе ожмаськонъёстэк музъем улэ кошкизы. Ог ӝыны даур талэсь азьло Яр ёросын 120 пала гурт вал. Нош туннэ соос кык поллы кулэсмемын ни. 2002-тӥ-2010-тӥ аръёсы ёросын улӥсьёслэн лыдзы витьмослы ичиёмиз. Тани 1959-тӥ арын ёросын 31 сюрслэсь трос калык улэ ке вал, туннэ — чылкак 13 сюрс мында гинэ! Нош кыӵе чебересь вал гуртъёслэн нимъёссы: Бердыш (кылбурчилэн Флор Васильевлэн дорез), Заризьйыл, Чибинькар, Кушман, Чипья, Юськойыл, Лэзя…

...Вашкала Сибирь сюрес кузя мерттылэм кызьпуос тросэз ланьырскемын, сисьмемын ни. Нош берлогес мерттэмъёсыз пиналэсь ай. Азьпаламы ӝоген пужымо-кызо инты сюроз. Пересьёслэн верамзыя, отын котьку но, пе, шырмачъёс, беглойёс улӥзы. Мынӥсь-ветлӥсьёслэсь котыръёссэс талаллязы. Табере сыӵеос ӧвӧл ни. Озьы ке но, та интыез, котьку сямен, азьмес-бермес сак чакласа ортчылӥськом. Отӥяз гурезь улэ васьком, пичи шурез выжыса, шай вӧзтӥ ӵыжы-выжыосмылы йыбырттом но Заводэ вуом…

Куд-ог дыръя та сюресэз валэн ортчылӥм. Гужем — капчи уробоен, толалтэ — кошовкаен. Эмъяськонние ветлыны шуыса, совхозысь валъёсты соку дунтэк висъяллязы (берло ини коньдон тырон тупатӥзы). Пудемысь амбулаториын пӧртэм врачъёс ужазы. Песянае лябгес адӟњыны ӧдъяса, ӵемгес синъёссэ эскерылӥз. Берло отысь эмъясьёсты мон но тусын-буйын, нимын-тулын тодылӥ ни. Туж паймисько вал: ӟуч врачъёсын но Матрона песянае соос сямен ик вераськылӥз. Тросэз кылъёс мон понна воксё валантэмесь потылӥзы. Песянай ӟуч кылэз тодэмзэ тазьы валэктылӥз:

— Лек война дыръя, пие, гуртамы огпол пенӟакъёс вуизы. Одӥгзэ семьяез дорамы но интыязы. Гын сапег лэсьтыса улӥзы соос. Нырысь-валысь ог-огмес туж шуген валаллямы. Берло мон ӟучлы дыши, соос — удмуртлы.

Бадӟымгес будэме бере гинэ тодӥ, кинъёс-маръёс со «пенӟакъёс». Асьсэ палан ожъёс мынон вакытэ ми доры Пенза улосысь кошкемъёсты-пегӟемъёсты интыяллям вылэм.

…Тани ми Пудемын ни. Вӧзамы, эгырен эстӥськыса, сьӧд куака кадь ӵынам паровоз дугдӥз. Сьӧраз — дасо пала вагонъёс. Куд-огезлэн ӧсъёссы воксё ӧвӧл. Кировысь вуэм поезд калыкен тырмемын. Но милемлы песянаен инты кызьы но озьы сюриз ик. Паровоз пельёс ӵоктаськымон кеськиз, курыт ӵынэн вагонъёсты тырмытыса ик мур шокчиз но Омутнинск пала туккетӥз...

...Лида атяен (апаен) Женя кырси сокугес гинэ кышнояськиллям вылэм. Морякын куинь ар ветлэм кырсиелэн зарезь тӧлъёсын вешам, сылало омырен но вуэн пыӵатэм дӥськутэз бездыса вуттымтэ вал ай. Кыӵе синмаськи мон солэн чебер дӥсезлы! Нош котьмалэсь но зол — кык лентаё ныртэм картузэзлы…

Кузь баракысь одӥгаз висъетэ пыремелэсь азьло син шорам йӧтӥз ачим быдӟагес ик пияш. Кузь коридор кузя машинаен ворттылэ вал. Мон шудон машинаосты но киям умой-умой ӧй кутылы на вал, нош та пияш зэмос машинаен ворттылэ ни!

Ӝӧк сьӧрын кунояськыса пукыны чидан ӧй вал ни. Кузь сюресэз ортчыса, кӧтме тыри-а, ӧй-а, пыдъёсы асьсэос ӧс сьӧры нуизы. Нош пияш доры мыныны уг дӥсьтӥськы. Кызьы мон соин верасько? Мон — удмурт, со — ӟуч. «Тон монэ жугод-а? Тон монэ кокалод-а?» — ас поннам сипыртыса сылӥсько.

Лида атялэн верамезъя, ӝоген, пе, со пияшен ми ӵош шудӥськомы вал ни. Вошъяськыса-вошъяськыса машинаеныз но ворттылӥм, ог-огмылэсь нимъёсмес но тодӥм. Нош кыӵе кылын куспамы лабыртӥм? Со сярысь туннэ нокин но уз вера ни. Угось ӧвӧл ни Матрон песянае но, кырсие но, атяе но… Та пумиськеммы бере со пияшез мон огпол но ӧй адӟылы ни. Нош милемлы кыкмылы гинэ валамон кылын вераськеммы пыраклы сюлмам кылемын.

Удмуртомон

Дауръёс ӵоже гуртамы удмуртъёс гинэ улӥзы. Мынам тодэмея, отчы куинь мурт мукет выжысь вуиз но берло ваньзы ик удмуртомизы.

Соос пӧлысь нырысетӥез — Бигер Олёш (оло башкир, оло бигер? Оло ке нош асьме выжыысь ик-а меда?). Та воргорон туж аспӧртэмлыко возиськиз. Чупчи дурысь возьёсмы ог дасо иськемын. Отчы тракторен-машинаен пырак кырӟаса ветлылӥмы вал. Нош Бигер Олёш ми кырӟан вакытэ махорказэ бинялтоз но, одӥг тамак пумзэ Чупчи дурозь сюпсьыса, мыноз вал. Зэм, со дыр ӵоже ӵындонэз олокӧня пол кысылӥз, ачиз Олёш машина зуркатэм улсын умйылскылӥз. Нош тамак пумыз ымысьтыз ӧз усьылы. Нуназеяны пуксьыса, Бигер Олёш одӥг курегпуззэ кык шорем ӟег нянен куртчыса сиылӥз.

...Хрущёв кивалтон вакытэ быдэс гуртысьтымы (ог 80 корка) вань скалъёсты гозыяса выт тырон чотын сӥльлы нуллӥзы. Туннэ кадь ик син азям Галя нимо куӵо скалмес азбарысьтымы поттэмзы. Милемыз, ньыль нылпиосты, жаляса, анае соку бӧрдыса катьттэммиз, азбар шоры пограса кылиз…

Берло ини, кылем даурлэн 80-тӥ аръёсаз, «Советской Удмуртия» газетын ужакум, дорамы луэм кадь ик суредэн пумиськи Дэри ёросысь Подшивал гуртын. Отын ог кык сю коркалы одӥг гинэ скалзы вал. Та пумысен мон «Быдэс гуртлы — одӥг скал» нимо йыръянэн статья гожтӥ. Нош милям гуртамы со одӥг скалэз Бигер Олёш возиз. Нюлэсчиын ужась муртлы соку турнан инты но висъяллязы, пудо но ас мылкыд каремезъя возьыны лэзьылӥзы. Нош мукетъёсыз, дасо иськемъёсысь кораськем бервылъёсысь турнаса, лӥялъёс вылэ ӵогӟылыса, тыбыр вылазы ворттыса сиён люкаллязы. Соин-а скал вордыны быгатод?

Будэ пияш, кошке арлыд.

Зӧклуд*, Ягвыр*, но Мувырбам*,

Ошмесъёсын узыр Туммы...

Ваньмыз ик со улэ йырам,

Уг пот кыре, шӧдэ сюлмы.

Пинал дыръя ӧй си мон тыр –

Скалмы луиз кадь колбаса.

Туннэ, шуо, сыӵе вал дыр.

Малы улӥм нош ватыса.

Одӥг мугло кылиз гуртэ –

Со скал-а бен яке синпель?..

Пичи дырысь будӥм йӧлтэк,

Ярам, узыр вал сик но тэль.

Мар ӝожанэз ортчемезлы,

Сиим, ӧз вун на ӵуж-ӵуж нянь.

Со кукуруза шуонлы

Тау кареммы, тодско на, вань.

Курытпотлэсь ӧй си колды,

Ӧй кушалля сулэз, нинэз.

Соин уг ушъясько, вылды,

Нош кызьы ушъятэк нянез?

Тодско на, песянай кызьы

Колды шора вал пичиен.

Туннэ – пыд уламы, возьыт –

Юдэс кирга, пудо сие.

Сӥзьыл ӵемгес малпаськиськод:

Улон – ӧвӧл кесэг выжон.

Кизид, нош мае кутсаськод?

Оло, тон весь сюрес вожын?

Оскон поэмаысь люкет.

Кыкетӥез гуртомы — Бесерман Марья. Таиз ми доры бызем кен. Яр ёросысь бесерманъёс, уйпал удмуртъёсын трос дауръёс ӵоже артэ улыса, ваньзы удмурт сямен верасько. Таиз но, ас кылзэ поттылытэк ик, удмуртъёс пӧлы сылмиз.

Кылем дауре 60-тӥ аръёс йылпумъяськыку, гуртамы туж аспӧртэмлыко семья вуиз. Воргоронэз асьме гуртын ик будэм Иван Петрович Владыкин вылэм. Солэн Михаил, Никон но Николай агай-вынъёсыз Быдӟым ожын быризы. Тазэ ож бусыослэсь заводын ужамез утиз, луоз. Угось пенсие потытозяз Ижын андан ӵыжатӥз. Оло, тазалыкез сярысь сюлмаськыса, оло, дор палъёсызлэсь мӧзмыса, ас вордскем гуртаз улоно кариськиз. Бертӥз гинэ но, тымет дурысь вырйылэ пужыё наличникъёсын жин-жин чебер корка пуктӥз. Котыраз бадӟымос сад кенераз но отчы ми дорын азьло будылӥсьтэм емышо писпуос но куакъёс мерттӥз.

Та семьяен ӵош дорамы эшшо одӥг паймымонэз вуиз на. Гуртомылэн кузпалыз пор выжыысь вал. Соку милемлы, покчиослы, та адямилэн нимыз воксё инсьӧрысь вуэм муртлэн кадь потылӥз. Но паймыса кема ӧм улэ: Маруся апай ачиз но удмурт луиз. Пусъё на: солэн племянницаез Галина Владыкина - Удмуртиысь калык артистка, озьы ик Россиысь дано артистка ним басьтӥз.

Удмурт луэме монэ огпол шуге-леке вуттӥз. Тодосчиен но кылбурчиен Георгий Архиповен умоесь кусыпъёс возьылӥм. Ярын улыкуз, ӵем дыръя уж дураз кожалляй. Нош Ижкарысен со ачиз ми доры куное ветлылӥз. Одӥг пол, Глазовысь совхоз-техникумын дышетскыкум, электричкае пуксьыса, Георгий Архипов доры мыныны малпай. Толалтэ. Ӝыт. Ланьырскем пу коркаезлэн тылъёсыз уг адско. Капка сьӧры пыри. Лапас ул быдэсак книга-газет керттэтъёсын тырмытэмын. Вӧзазы ик трос дасоосын кролик возён четлыкъёс. Пеймыт азьтӥ корка ӧс доры вуи. Ӵогамын. Лапас улын пеймыт, шимес. Кроликъёслэн ӵаштыртэмзы гинэ дырын-дырын кылӥськылэ. Ульчаетӥ ортчись муртъёслэсь пыд куараоссэс шӧдӥсько ке, капка азе потӥсько. Нош Архипов ӧвӧл но ӧвӧл.

Тани нош ик лымы ӟукыртэм кылӥськиз. Архипыч вуэ ни шуыса, шумпотыса потӥ но… Монэ шӧмаськем пиос котыртӥзы. Марзэ-созэ валаса но ӧй вутты — мыжык вуиз, нырысьтым ӟуз вир вияны ӧдъяз. Гужем вылтӥ ужаса поттэм коньдонэным со сӥзьылэ гинэ басьтэм выль курткае кеськемын. Очкие кытчы ке палдэмын… Бызьыса пегӟисьёсты мон бус пыртӥ кадь гинэ адӟи на. Нош жугыкузы, кылме юамзы пель сьӧрам ялан шуккиське: «Ученик Архипова… Ученик Архипова…» Мон туннэ ке но ӧй вала на, мар понна соос монэ сокем тышказы...

Книгалэн кужымез

Сахалинын ожгарчи дыръям, Удмуртиысь газетъёсы сяна, Хабаровскын печатласькисьёсаз но гожъяны вуттылӥ. Соку ик журналистэ дышетскыны ӵектонъёс вуыны ӧдъязы. Тужгес но трос гожтэтъёс ысъязы кылбурчи, тодосчи но журналист Георгий Архипов, шаерысьтымы калык писательёс Семён Самсонов, Герман Ходырев. Огпол Герман Алексеевич мыным «Солдат Спиридон Стрелков» нимо выль книгазэ ыстӥз. Сыӵе шумпотон вал со мон понна!

Ротаысьтымы уноез солдатъёс Удмуртиез со вакытэ умой-умой ӧз тодылэ. Дорамы «Иж» пусэн потӥсь мотоциклъёс, автомашинаос, пӧйшуран пыӵалъёс сярысь верам бере гинэ шаермы пумысен мар но со кылэмзэс шараяллязы. Нош писательёсмес кылылэмзы ик ӧй вал, шӧдске. Герман Алексеевичлэсь та книгазэ кыӵе гинэ калыкъёс ӧз лыдӟе, ваньзы ик отысь валтӥсь герой интые асьсэ муртсэс пуктылӥзы, вылды.

Тӥни кыӵе кужымез книгалэн! Герман Ходыревлэн та повестез озьы ик армие кылиз. Угось библиотекае ӵемгес вуылӥсьёс, доразы бертон азязы, отчы одно ик кыӵе ке синпель-книга кузьмаллязы. Мон асьме улосчимылэсь кельтӥ. Озьы тупаз: армиысь бертэм бере кӧня ке аръёссэ ми Герман Ходыревен артэ коркаосын улӥм. Огпол мон дорын куноын дыръяз «Солдат Спиридон Стрелков» книгаед вань-а шуыса, юаз. Мон Сахалинын луэм учырез верай но Герман Алексеевич туж шумпотӥз. Та книгазэ эшшо огпол кузьмаз на…

Но удмурт писательлэн книгаез частьысьтымы библиотекаын огназ вылымтэ. Сое синйылтыны юрттӥз таӵе учыр. Часте вуэме бере ӝыны ар ортчыса, Таджикистанысь пиосты вуттӥзы. Син азям сьӧдкысъем пияш йӧтӥз. Ваньмон дыръяз палэнэгес пуксёз но пичи блокнотаз мар ке но гожъялоз вал. Таджик пи кылбура вылэм. Нош мылкыдыз малы ке но воксё урод возиськиз. Библиотекаын ужасьлы мон валэктӥ, Мадагалевлэсь мылкыдзэ тупатыны кыӵе ке книга кулэ вылэм шуыса. Командирмылэн кышноез кема ик ӧз утчаськы, милемлы Геннадий Красильниковлэсь книгазэ мычиз. «Мон лыдӟи ини. Усто гожтэмын. Кельшоз…»

— Геннадий Красильников? — аслэсьтым кеськемме ик ӧй вала.

— Оло, землякед-а?

— Бен.

— Соку ӟечкыласько землякеныд, шонерзэ вераса, солэн книгаеныз пумиськеменыд.

Мон шумпотыса кутӥ Геннадий Дмитриевичлэсь повестьёсын бичетсэ…

Та учыр бере кема ик дыр ӧз ортчы, выль тодмое выльысь вордӥськиз кадь. Огпол матэктӥз но тазьы шуэ: тани, пе, калыкъёслэн эшъяськемзылы сӥзем кылбур гожтӥ. Нош юрттӥз мыным землякед, Геннадий Красильников, ас книгаеныз…

Мадагалиевен ӵош ик со гужеме ми Сахалинын ортчем литература нуналъёсы но пыриським. Та пумиськон дыръя ас синъёсынымы адӟим, ас пельёсынымы кылзӥм туж сӥё-дано писательёсты. Соос пӧлын вал Москваысь Александр Бобров, Ирина Волобуева, Олег Дмитриев, Юлия Друнина, Василий Емельяненко, Римма Казакова, Украинаысь Николай Братан но Иван Драч, Башкириысь Назар Наджми, Таджикистанысь Озод Аминова, Молдавиысь Анатол Чокану, Казахстанысь Нутфулла Шакенов, Ленинградысь Юван Шесталов, Латвиысь Пётр Юрциньш… Сомында писательёс, котькудӥзлэн асьсэлэн анай кылзы. Нош ваньзэсты огазея эшъяськон! Эшъяськон ке ӧй луысал, кык ар ӵоже солдат дӥсен ветлыны туж секыт йӧтысал.

Армиысь кошкыны дыр вуэмъя милемыз олокытчы но ӝуткалляны ӧдъязы. Огполаз частямы МВД-ысь лейтенант лыктӥз. Армия бере ми доры, пе, ужаны кариськиды ке, уд жалялэ. Мынам соку дор палъёсы бертыны туж ик мылкыды ӧй вал. Анайме армие мынон азьын ватӥм. Озьы малпаса, Сахалинэ кылёно кариськи. Тазалыкме эскеризы, тупаськод, пе. Кӧняке лейтенант луод, шуизы. Огдырлы лӧптӥ. Сахалинэ кыльыны малпанэ сярысь дор палъёсы ивортӥ. Соглаш луизы кадь.

Частьысь потон дыр вуиз. Нош азьпалан — быдэс уй. Со уй куспын мон Сахалин шормуӵысен Удмурт шаерозь ог дас сюрс иськемез кӧня пол мертай меда? Ӵукнаозь кык полэс мылкыдын улӥ. Одӥгез — Южно-Сахалинске кыльыны косэ, мукетыз — Ижкаре, дор палъёсы ӧте. Кыкетӥезлэн мылкыдылэн вормон кужымез бадӟымгес вылэм…

…Ӵуказеяз ӵукна роталэн командирез доры мынӥ но, мон Сахалинэ уг кыльы, шуисько. Со доллы шорам учке. «Кинлэсь, кинлэсь, нош тынэсьтыд озьы ӟечырамдэ-шонаськемдэ ӧй возьма вал».

Тӥни сыӵе со анай кылдэ, дор палдэ гажанлэн кужымез. Япония, Корея пала матынгес луыса но ас калыкедлэсь мӧзмон ворме вылэм. Одӥг уй мынэсьтым вань улон сюресме воштӥз. Куд-ог дыръя гырпумам куртчиськыны турттылон мылкыдъёсы луыло ик. Отчы кыльыса, погонъёс вылам кӧня ке бадӟымесь кизилиос пиштысалзы, дыр. Пенсие но егитысен потысал. Оло, кытын ке мукет карын улысал. Нош соин ӵош ик удмурт кылын лыдӟысал-гожъясал на меда?

Уралын гурезьёс ӝужытэсь,

Соослэсь но ӝужыт –

Сахалин сопкаос.


Уралын уй тӧлъёс кезьытэсь,

Соослэсь но кезьыт –

Сахалин пал тӧлъёс.


Сахалин тол уйёс туж кузесь,

Соослэсь но кузьгес –

Тон доры сюресэ.


Нош вуэ ке гожтэт

Тынэсьтыд, мусое,

Вандӥсь тӧл но небыт,


Сюресэ но капчи,

Кузь уйёс но вакчи,

Сюлэмын но шуныт.

«Советской Удмуртия» газетын ужаны кутскыса, ӝыт-ӵук-а, сюрес вылын-а, ужан интыын-а — выль чуръёс тросгес но тросгес кылдылӥзы.

СССР-ысь писательёс Удмуртие вуылон дыръя, соослы сӥзьыса, буклетъёс, газетъёс, нимаз номеръёс потылӥзы. Ӵапак соку мыным тужгес но сӥё-дано поэтъёслэсь чуръёссэс нырысьсэ удмурт кылэ рос-прос берыктыны кылдӥз. Со ужъёсы газет-журналъёсын печатласькизы. Тужгес но вунонтэм кылизы Андрей Дементьевлэн «Нянь», Каюм Тангыркулиевлэн (Туркменистан) «Чуньы» кылбуръёссы, Михаил Матусовскийлэн «Капитан Половчень» балладаез. Аръёс ортчемъя та кутскем уже уката паськытаз, муромиз. Туннэ нуналозь, ӟуч писательёслэсь ужъёссэс сяна, дасоосын мукет кылъёсын вераськись эшъёсылэсь-тодмоосылэсь чуръёссэс асьме лыдӟисьёс доры вуттӥ ини. Соос пӧлын тужгес но тросэз финн-угор дуннеысь луо.

Мынам но ужъёсы пӧртэм кылъёсы берыктылэмын: ӟуч, эстон, фин, коми, коми-пермяк, чуваш, пор, мордва, бигер но мукет. Туннэ нуналозь нылпиослы но бадӟымъёслы ӟуч но удмурт кылын даслэсь ятыр книгаосы печатласькизы ини. Данакез ужъёсы Ижкарын но Москваын потэм анталогиосы, дышетскон книгаосы пыртэмын, кылбуръёсыя гожтэм трос дасо кырӟанъёсы, сцена вылысен сяна, ӵем дыръя радио но телеведение пыр чузъяськыло. Чупчи но Ватка вискысь огшоры удмурт гуртын будэм пияшлэн куараез Россилэн трос калыко бадӟым зарезяз но, солэн палэназ но шапыкен-шапыкен пальккаськыса-шуккиськыса пумен кыдёкегес но кыдёкегес вӧлме. Нош нимаське со — Эшъяськон тулкым!

Эмезё но, палэзё но

Шаере одӥг мынам.

Сӥзьылэн куаръёс тӧлӟо но

Дор палан сюлэм шуна.


Жильыртӥськод пель сьӧрам тон

Вунонтэм чебер шуре.

Выль крезьгур ӵошен мытом ми,

Пыралом чылкыт ӧре.


Юн ужась но, муспотон но

Гуртамы улэ калык:

Тӥр кутэ, басьтэ кусо но –

Киосаз шудэ тӥрлык.


Кырӟаны но, эктыны но

Быгато гуртоосы.

Вож-вож сад кадь ульчамы но,

Улос шулдыр тыосын.


Узыен но, губиен но

Нюлэсъёсмы узыресь.

Дыдыен, батыр пиен но

Эх! кыӵе дуно доре!


Огпол вуыл ми пала тон,

Пыштурынэн чай юод.

Перепечен, шаньгаен но

Бадӟым куномы луод.


Эмезё но, палэзё но

Шаере одӥг мынам.

Вордӥськем палъёс уг вуно –

Ойдо куное дорам!


* Кылбурен гожтэм чуръёсыз авторлэн.

Добавьте свою историю о событии или человеке!

Добавить свою историю